SOFÍA E AS POSTSOCRÁTICAS

é unha obra que versa sobre a violencia machista desde unha perspectiva filosófica, empregando máis concretamente ideas da filosofía grega con tres personaxes en escena: Sócrates, Aristóteles e Platón (interpretados por Silvia Penas, María Roja e Marta Pérez) que empregarán recursos de marionetas a escala real ademáis dunha técnica visual sobre o escenario que consegue a duplicación das personaxes e marionetas. Nesta peza, a escenografía, xunto coa poesía e a música xoga un papel sumamente importante e o eixo fundamental teórico é establecer un novo logos na actualidade. Que significa isto? O logos non é máis que un cálculo verbal do mundo, é dicir, cando Sócrates se pregunta pola virtude, pregúntase se un home é máis ou menos virtuoso, polo tanto o que está facendo é calculando un patrón interpretativo da realidade. As nosas Postsocráticas: Sócrates, Platón e Aristóteles intentarán establecer un novo logos, é dicir, calcular que é e que non é violencia machista. Temas como A Manada, o silencio como resposta, a disolución de responsabilidades, o público-privado-político, o chámado victim blaming (culpabilizar á víctima), o síndrome espectador, así como falar do maltrato desde a perspectiva de que o maltratador é o noso amigo, serán tratados de xeito meticuloso polas tres personaxes ata acadar unha reflexión no público asistente. Será tamén este quen deba tomar unha decisión importante sobre o propio espectáculo.